BotaLajmet e fundit

Turkmensitani i shton kontrollet ndaj popullit pas trazirave në Kazakistan

Turkmenistani e ka shtuar kontrollin ndaj jetës së banorëve të vet pas trazirave të fundit në Kazakistan, duke dërguar policë në zona të banuara dhe duke ua kontrolluar telefonat njerëzve.

Ora policore natën papritmas u vendos këtë javë në Mary, kryeqytet i provincës me të njëjtin emër, thanë banorët. “Ora policore fillon në orën 21:00 dhe automjetet e policisë i patrullojnë rrugët tërë natën”, tha një banor i kësaj province.

Automjetet e policisë u afrohen njerëzve që rrinë dhe bisedojnë në rrugë dhe policët u kërkojnë që të shpërndahen, i thanë disa banorë Radios “Evropa e Lirë”.

Ata thanë se policia mundohet që ta arsyetojë sjelljen e vet me zbatimin e distancës sociale për ta parandaluar përhapjen e Covid-19, ndonëse autoritetet turkmene kanë këmbëngulur se asnjë banor i këtij shteti nuk është infektuar me koronavirus, pavarësisht raportimeve nga personeli shëndetësor se shumë njerëz janë infektuar dhe gjithashtu kanë vdekur gjatë pandemisë.

Banorët thonë se policët i ndalin edhe të rinjtë dhe ua marrin telefonat për t’ua kontrolluar mesazhet dhe listën e kontakteve. Njerëzit folën në kushte anonimiteti, duke u frikësuar nga hakmarrja në shtetin e kontrolluar fort, që nuk toleron kritika.

Raportohet se zyrtarët e sundimit të ligjit kanë bërë vizita të paparalajmëruara ditëve të fundit në shtëpitë e personave që kanë familjarë që studiojnë ose punojnë jashtë vendit. Ata i paralajmëruan familjarët se kush ndodhet jashtë vendit të mos shpërndajë mesazhe ose deklarata kundër Qeverisë së Turkmenistanit.

Related Articles

Leave a Reply

Back to top button